Plourent, crïent, grant deul ont demené.
« Dieu ! ce dist Charles, doulz roy de majesté !
« Moult se dolent paiens en ça cité,
« Grande noase maynnent, paiens sont effrayé. »
Ly emperiere a Fagon appelé :
« Sire Fagon, dist Charles le sené,
« Par celle foy que vous debvez à Dé,
« Quar en alez à ce mur quennellé
« Novelles querre, que saichon de verté
« Pourquoy payens sont enxin effrayé ? »
— « Sere, dist il, voulentiers et de gré ! »
Ysnellement s’est le vasal armé,
Vient à la porte illec s’est aresté.
LA tour Aiquin la seust l’en appeler :
Et [le] bas estage qui siet emprès la mer
E[st] la grant chartre, pour [vroy] le puis conpter,
Où roy Aiquin fist les prinsons bouter ;
Là le[s] fesoit verser et trebucher.
* « Certez, dist Charles, la me conpvient briser (fo 40 vo)
* « Pour les en trere et les en delivrer. »
* Dès maintenant s’i fist le roy mener,
* Juqu’à la chartre ne se voulst arester.
Le ber Fagon ne se voulst arester,
Juqu’à la porte s’en est alé le ber ;
