« Illec seron, s’il vous plaist, arivé. »
Paiens respond[ent] : « Sy il nous vient à gré. »
Naigent [et] siglent les paiens deffayé ;
Le vent de Nort lour est de mer tourné ;
Tant ont par mer expleté et siglé,
Ou havre en Brest sont venu et entré.
En la ville entrent les paiens defféé,
Don Memerion estoit desherité,
Qui en fut seres en [toute] antiquité ;
Més si Dieu plaist le roy de majesté,
Encores en sera sires et avoué.
Leans [se sont] les peans eschellé,
De vitaille orent à grant planté ;
La nuyt reposent tant qu’il fut ajourné.
Et l’andemain quant le soulail fut levé,
A l’amirant ont tantost demandé
Quel part yra, ne en quel reaulté ? (fo 39 vo)
« A Car[a]hès, ce lour dist l’amiré,
« Que ge conquis sus Ohès le barbé ;
« Durement a de ma gent afolé
« A Quidalet ou grant est[or] champé ;
« [Doreit] men ni[é]s y fut par lui naffré
« Par[my] le corps d’un grant espiez quarré ! »
Lors sont paiens sus lours chevalx monté,
Roys Aiquin monte et tretout son barné,
Et la roïgne qui moult ot de beaulté,
D’ilec s’en sont à Char[a]hès alé,
Drecent les murs, reparent l[es] fousé.
Page:Anonyme - Le roman d'Aquin ou La conquête de la Bretaigne par le Roy Charlemaigne.djvu/218
Le texte de cette page a été corrigé et est conforme au fac-similé.
84
la conqueste de la bretaigne
