« Ilz ont nostre or qui estoit arivé,
« Tretout ensemble l’en ont o eulx porté !
« Dinart ont ars, don moult suy avillé,
« Et mes amys don g’avaye à planté.
« En ceste ville nous ont cy asiegé,
« Par mer, par terre nous ont avironné ;
« Forment me guiettent, yce m’a l’en conpté
« Que ne m’en fuye ou regne ou ge fu né.
« Dedans Sesambre est de lours gens alé,
« Et sy y sont et logé et entré,
« Pour m’y guietter sont là [touz] ostellé ;
« Fagon et Nesmes y sont eulx deux alé,
« Et maint Francs y ont o eulx mené ;
« N’ont que mil hommes ; yce m’a l’en conpté ;
« Armez vous tost, francs vasalx honoré,
« Ja sera vespre et le soulail cliné ;
« La lune raye qui donne grant clarté, (fo 27 vo)
« Ja par lour roy ne seront secouré,
« Quar ne soit [pas] de cest consail privé,
« Ains que soit jour bien serez retourné. »
Payens respondent : « À vostre volenté,
« S’il soit honni et si ait mal dehé, :
« Qui n’y ferra o le branc aceré ! »
Cinq mille payens se sont [tost] adobé.
Ha ! Dieu, vroy pere, sire adouré !
Enqui seront noz gens desbaraté ;
Quar petit sont encontre tant malfé !
Page:Anonyme - Le roman d'Aquin ou La conquête de la Bretaigne par le Roy Charlemaigne.djvu/192
Le texte de cette page a été corrigé et est conforme au fac-similé.
59
par le roy charlemaigne
