Illec fut mys le peuple Damme Dé,
Qui en bataille ot esté decollé.
Une chapelle fist sur les martyrs Dé ;
Sur le charnier fut le moutier fondé
De saint Esti[e]ne en fut le mestre aulté.
Quant Charlemaine ot sa gent enterré,
Lors fist grant deul, forment s’est dementé :
« Helas ! dist il, à quoy fu onques né !
« Mors sont mes hommes et mon riche barné ;
« Or soi ge bien tout sey[e] achetivé,
« N’auray mès joaye en tretout mon aé ! »
Nesmes ly ducs l’a moult reconforté :
« Sire, dist il, mercy pour l’amour Dé,
« En grant deul fere n’est nul bien recoupvré ! (fo 20)
« Forte est la ville et fier luy amiré ;
« Ja qu’il [ne] puisse n’amera Damme Dé. »
— « Non, ce dist Charles, mal fut sa grant bouté,
« Quant il ne croit Jhesu de majesté. »
Endementent qu’ilz ont enxin parlé,
Par la champaigne sont noz Franczoys alé.
Haubers, heaulmez y ont assez trouvé,
Escuz et lancez et maint espiez quarré,
Auxi hachez et maint dart enpanné,
Et des espées qui gectent grant clarté,
Jupes de peiles, ciclatons de cendé,
Aultres richesses don y a à planté ;
Et maint destrier bausen et pommelé
Don lours seignours estoint mors et tué.
Page:Anonyme - Le roman d'Aquin ou La conquête de la Bretaigne par le Roy Charlemaigne.djvu/176
Le texte de cette page a été corrigé et est conforme au fac-similé.
43
par le roy charlemaigne