Page:Anonyme - Le roman d'Aquin ou La conquête de la Bretaigne par le Roy Charlemaigne.djvu/173

40

la conqueste de la bretaigne

De nos Franczoys ot quatre cents occis ;
Richard naffré, Ripé et Baudonis,
Hues, duc Nesmes, et Geffroy l’Engevins.
En cieul estor fut Tïoris occis,
990Celuy de Vennes, pere fut Rolendis.
Moult y ot mors de barons Saint Denis,
Dont l’emperiere fut moult maltalentifs.
Le roy de France regrete ses amis :
« Franche mesgnée ! Mal fustez onc nourris ;
995« Or estes mors, moult en suy affeblis,
« Mors sont mes hommes dont ge estoie servis ! »
Luy roy[s] de France fut forment marris,
Forment regrete la gent de son pays ;
Sur touz les aultres regrete Tïoris :
1000« Franche personne, gentil duc potéis,
« Pour le servige que jadis me feïs, (f^o 18 v^o)
« Te donnay famme Bagueheut la gentis ;
« Ma serour est, la belle o le cler vis ;
« Or en est veusve et Rolend orphelins ! »
1005Quant luy roys ot regreté le marchis,
Troys foiz se pasme le bon roy potéis,
A terre en chiet [du] bon destrier de pris ;
Dolent fut Charles et moult maltalentifs,
Moult le conforte duc Nesmes le gentils.
1010Ly roys monta sy tost à l’arson prins,
L’estreff lui tint Nesmes ly potéis,
L’escu enbrace le roy de Saint Denis,
Point le cheval des esperons mansis ;