« Onc puis ne fu o femme marié,
« Et non seré ge jamès en mon aé,
« Quar ge suys [ores] moult vuil et moult usé ;
« De sang de famme moult ha que ge fu né ;
« Quar de famme ne sera vuil homme amé,
« Qui [ne] la peut bien servir à son gré ;
« Vuil hom fredist quant il est en aé,
« Et geune famme pour [dire] verité
« Soupvent eschauffe, telle est sa qualité,
« Qui sont à paine elx deux à ung gré ! »
Quant Franczoys l’oyrent, grant joaye en ont mené ;
Moult se en sont entre elx ris et joué ;
Et luy respondent : « Ce semble de verté. »
Or leray cy d’Ohés dont j’ay parlé ;
Si vous diray de Aiquin l’amiré
Qui en Quidallet est la forte cité.
EN la Cité est l[y] fort roys Aiquin ;
Forment menace Charles le filz Pepin
Qu’il l’ocira o son brant acerin ;
Ou le fera mouriz à malle fin,
Dedans Orcigle dedans ung sien terrin,
En la grant [chartre] don le mur est de chaulx fin ;
Et luy fera, ce dit, adourer Apolin,
Et Mahommet, Jupiter et Jupin,
