Lors se devalle aval dedans le sablon,
A cheval si monte et se prant à l’arson ;
Ly ost sy s’arote et sans nulle tanczon,
Sounant lours [cors] de couepvre et de leton,
Des cors qui sounent moult est grant le treson.
Là veïssez maint destrier d’Aragon,
Mainte baniere et maint bel gonfanon,
Et mainte lance et maint bel feinion,
Et maint escu qui fut paint à leon.
Lors chevaulchent la greve et le sablon,
Et passerent Seüne et sesirent Coaynon ;
Ce sont dous aeves qui portent le dongeon
Entre ly Normens et entre ly Breton.
Juqu’en Bretaigne n’y font aretaison,
A Doul s’en vont sans nulle aretaison ;
Une cité, arcevesque y ot bon
Pour porter armes contre la gent Mahon.
Or en va Charlez adourer saint Sanson ;
Illec pria ly roys et ly baron
Que Dieu lour face de lour peché pardon,
Et lour doint force vers la gent de Mahon. (fo 2)
Illec abvoit maint chevalier Breton,
Contes et ducs, et maint riche baron,
Que Sarrazins, qui ja n’aient pardon !
A chascun d’eulx ont saesi sa méson,
Tant comme ilz furent en Sesoiene o Charlon.
De ces barons veil fere mencïon,
Page:Anonyme - Le roman d'Aquin ou La conquête de la Bretaigne par le Roy Charlemaigne.djvu/137
Le texte de cette page a été corrigé et est conforme au fac-similé.
4
la conqueste de la bretaigne
