sans partir ne retourner en France ; mais tousjours conquéroit avant sur les ennemis de la foy.
« En ce temps avoit ung roy fort puissant, Sarrasin, qui s’appelloit Aquin, lequel roy estoit de Bougie et de Barbarie [1] à l’opposite d’Espaigne et des circonstances, car Espaigne mouvant des Pors, est grande à merveilles... et jadis conquist le grant roy Charlemaine toutes icelles terres et roiaulmes. En ce séjour que il y fist, le roi Aquin, qui roy estoit de Bougie et de Barbarie, assambla ses gens en grant nombre, et s’en vint par mer en Bretaigne et arriva au port de Vennes, et avoit amené sa femme et ses enffans, et se amassa là entour ou pays, et ses gens aussi s’i amassèrent en conquérant tousjours avant. Bien estoit le roy Charlemaine infourmé de l’entreprinse de ce roy Aquin qui se tenoit en Bretaigne, mais il ne vouloit pas pour tant rompre ne deffaire son voiage d’Espaigne ne son emprinse. Et disoit : « Laissiés-le amasser et s’enarroyer en Bretaigne, ce nous sera ung petit de chose à délivrer le pays de luy et de ses gens, après que nous aurons acquittié les terres de deçà les mons et tout réduit à la foy crestienne. »
- ↑ Aquin n’est pas roi de Bougie dans la chanson, mais il est appelé le Barbarin (v. 3026).
