Ainz ne tornerent en la sale pavée,
Mès por veillier ont la biere portée
A la plus mestre yglise.
Dedenz Nerbone a grant procession
Portent la biere a Saint Pol lo baron ;
Iluec ajostent d’entor et d’environ
Li chevalier et tuit li haut baron,
Clerc et provoire, jent de religion,
Homes et femes et petit enfançon ;
Plorent et crient et font tel marrison
Qu’en n’i oïst nule rien se plor non ;
Et li borjois s’escrient a haut ton.
« Aymeri sire, jentil fil de baron,
« Bon chevalier, home de grant renon,
« Quant estes morz, que devenir porrons ?
« Qui vos a mort, de verté le savons,
« Tot a cest regne mis a perdicion ;
« Or i vendront Paien et Esclavon ;
« Si aorrons Tervagan et Mahom,
« N’i crera l’en Jhesu Crist ne son non ;
« Et nos dolant, en quel païs fuirons ?
« Se ci nos trovent li encriesme felon,
« Ne nos garra avoir ne raençon
« Que ne perdons les vies. »
- ↑ CXXXII. — 4044 omis dans C. — 4045 C La ajostent. — 4046 omis dans C. — 4050 A B cri non. — 4051 A B Et cil b. escrient. — 4053-4 omis dans C. — 4053 A B et hons de g. — 4056 A B Mis a c. r. en grant destrucion. — 4061 A B Se nos i truevent li Sarrazin f.
— 4040 A B Onc ne t. — 4041 C Mès par Nerbone ont. — 4042 C haute glise.
