Ne si ami ne si apartenant,
Ainz lo conroient et bien et richement
Et enbasmerent de basme et d’oignement,
En cuir de cerf cosu estroitement ;
Covrent lo conte d’un paile d’Orient
Et a Nerbone l’enporterent sa jent
A Hermenjart la contesse vaillant.
Biax sire Dex, voirs pere tot poissant,
Quant el savra ce domaje pesant
Del jentil conte qu’ele avoit amé tant,
Molt avra bien Jhesu Crist a garant
Se de duel ne chiet morte.
Quant enterré sont li baron de pris
Et enbasmez fu li quens Aymeris,
Li franc baron l’ont en litiere mis,
Sor .ii. chevax l’enportent li marchis.
Auquaire lessent por garder lo païs ;
Mès en sa terre vet Joifroiz de Paris,
Si enmena la pucele jentil,
Cele qui l’ot fors de la chartre mis
Et lo messaje porta roi Looys :
O lui l’enmoine Joifroiz en son païs,
Si l’esposa si com li ot promis.
Et li baron n’i ont plus terme quis,
D’Esclabarie partent, s’ont congié pris ;
- ↑ CXXIX. — 3922 C a garder. — 3923 C En sa terre. — 3924 D au cler vis. — 3927 A B C Si l’enmoine, B enmena. — 3929 A B lonc l. — 3930 C De Tabarie.
— 3908 A B d’un molt bon o., C enoistrent. — 3909 A B couvert molt richement, B noblement. — 3911 D Car a. — 3913 C rois celestre poissant, A B pere omnipotent. — 3915 A B Du vaillant conte, C Del franc c. — 3916 A B El avra bien. — 3917 A B Se ele ne c. morte, C ne s’acore.