Page:Anonyme - La Mort Aymeri de Narbonne.djvu/192

Le texte de cette page a été corrigé et est conforme au fac-similé.
135
la mort aymeri de narbonne

« Que fet avez estranje vilanie,
3135« Que les avez vendues et traïes
« As Sajetaires ques ont en prison mises,
« En une chartre, dedenz Esclabarie. »
Aymeris l’ot, n’a talent que il rie.
Li quens Auquaires a la parole oïe
3140Que Sajetaire ont la cité sesie,
Et Clarissant et sa grant conpaignie
Est en la chartre dolerose et sotive ;
Detort ses poinz voiant la conpaignie,
Et vient au roi, envers lui s’umilie,
3145Et docement por Deu merci li crie :
« Droiz emperere, qui France as en baillie,
« Quens Aymeris a la barbe florie
« M’avoit doné cele cité antive
« Que Sajetaire ont par force sesie,
3150« Et en la chartre est Clarissant m’amie ;
« Par vostre amor ai je ma loi guerpie
« Et croi en Deu, lo fil sainte Marie.
« Se par vos n’est, ne li puis fere aïe. »
Li rois respont : « Ne vos esmaiez mie.
3155« Se Dex m’aït, li filz sainte Marie,
« Molt volentiers vos i ferai aïe
« A la cité reprendre. »

    — 3134 A B Que tu as fet. — 3135 A B Car tu les as. — 3137 A B Enz en lor ch. — 3138 A B qu’il en rie, C si n’a t. qu’il r. — 3139 A B Li bons Auq., C Et Auq. — 3141 C D la bele et l’eschevie. — 3142 omis dans C, D Est en prison, en la chartre enhermie. — 3144 C D durement s’u. — 3145 D Molt jentement. — 3147 A B Danz A. — 3148 A B une cité antie. — 3149 A B Li S. l’ont. — 3150 A B Et en prison est C. — 3151 A B Pour l’amour D., C a sa loi relenquie. — 3153 A B Se par vos non, C D ne lor p. — 3155 A B Se m’aït D.