Fuiant s’en va l’aumaçor Clarabins ;
Si l’enchauça li bons rois Looys.
Il li escrie : « Retorne, Sarrazin ;
« Aumaçor es et rois poesteïs,
« Rois sui de France, si ai non Looys :
« La moie foi loiaument te plevis,
« Onques encor par home ne chaï ;
« Se tu m’abas grant los i avras pris.
« Ja n’i seras engigniez ne traïz,
« Se je meïmes par mon cors ne t’ocis. »
Dont s’arrestut l’aumaçor Clarabins.
Dist a ses jenz : « Seignor, estez ici ;
« S’irai joster au fort roi Looys.
« Por une joste ne serai or eschis ;
« Se une en volt, je l’en livrerai .vi. »
Dient si home : « Mahom vos en aïst ! »
Tornent les resnes et si mostrent lor vis ;
Plus tost les portent li destrier arrabis
Que fax ne vole quant il chace perdriz ;
Granz cox se fierent sor les escuz votis,
Trenchent les cuirs et lo fust de sapin,
Plient li fer de l’acier poitevin ;
Otre s’en passent que nus d’ax n’i chaï.
— 2789 A B en va, C Corabis, D Claraby. — 2790 A Et l’e., B Et bien l’e., C li forz r., D Au dox l’anchauce. — 2791 Qui li crie, B Et li escrie, D L’aumaçor torne a mi. — 2792 omis dans A B, D Almançor ies fort roi pooteys. — 2793 B si a non, C Et je sui rois si ai n. — 2796 D grant los as aceilly, C monté sera tes pris. — 2797 A B Ja n’en s. — 2798 C Se par mon cors tot sol n’i es ocis. — 2800 D ses homes : S. estez vos ci, C Baron, e. — 2801 A B Si josterai, C Joster irai. — 2802 D ja e. — 2803 A B .x., D S’il en veult une, C li livrerai. — 2804 C Dient li sien, D Mahomet vos aïst. — 2805 A B Prennent les resnes, D Vire la r. et si monstre son vis. — 2806 C li bons destrier de pris. — 2807 C com il voit la p. — 2808 B elmes v. — 2809 A B Brisent les ais, C Copent les c., D Cope le cuir. — 2811 A B O. passerent, D c’onques nul ne c.
