Qe tote l’a li quens a sa gient delivree.
Par consel Filidés ou la chere membree
Fu la gient Saracine retenue et gardee,
Dedanz un grant palés et mise et ordinee,
E ceschuns bien serviz de quant qe lor agree ;
Mais n’en ert un lasez si ert la carn lavee.
Or a Rollant li quens son tallant et ses bon ;
Les Paiens feit garder sains nulle mesprison ;
Filidés en apelle et un suen compaignon :
« Fetes moi ci aportier Apolin e Macon
« E trestoz les ymages de Diex malvas fellon,
« Si les feromes fondre a feu et a carbon ;
« Aprés si les donrai mi home e mi baron. »
— Sire », dist Filidés, « par tiel intencion
« S’il a en vostre gient prestes, cele tençon,
« Feites moi batiçer, je vos en quier le don ».
Adonc Rollant l’acolle et lui dist : « Si feron.
« Primirans mangeromes par itiel devision
« Q’il n’a en tot ma host ne velars ne garçon
« Qe d’ier terce en ça gostast de garison. »
Hec vos sor le palés Hestous le filz Hodon :
Gerarz i feit porter, le bier de Roseillon ;
Li mires l’enbendirent, ja n’i ert doteison ;
En une painte cambre de l’estorie Platon,
O le cours des estoiles fu escrit environ,
La le ferent chougier sour un lit large e bon.
Asiez fu regretez dou Roman campion.
Hestous en jura Cil qe maint en Aquilon
- ↑ — 10384 un sue c. — 10387 Si es f. fondir — 10389 entincion — 10390 teçõ — 10391 quiert — 10398 deteison — 10401 chõgier
— 10376 deliur — 10377 membre — 10380 bien seuuz