Paiens s’aresterent par devant lor baniere.
Por le dit Ysorez se retrerent ariere ;
Devant la matre porte, qe fu de marbre piere,
Arestent l’estendars et la rice baniere.
Par devant l’oireflor s’aresta l’anperere,
Joste lui Salemuns et Naymuns de Baivere.
Au mielz q’il puet s’an torne, feisant mout leide ciere ;
Esconjurant an veit Jesu Crist e sa mere
Qe la fue q’il feit Rollant vendra ciere,
Cum s’afeit a traitors et a fils de leciere :
« Ainz ne fui je traïz par si fete mainere.
« Sir Diex, par cele grace qe donais a saint Piere
« Qe dou saint Pareïs lui donais la cleveire,
« Done onte celui qe amoie plus qe frere !
« Jameis tiel traïsuns, plus orible ni fiere
« Ne fist rois Peleüs, q’envoia por la mere
« Ses niés Jason a mort an l’isle Qalcantiere. »
Adonc pase des lices la porte batailere ;
Ne tornast uns defors par l’or de Salebiere.
François entrent es lices ou les penuns reiaus ;
Lor cors desarmerent ; mult i oit enavrez d’aus.
E Paiens en la ville tornerent comunaus ;
Les ponz ferent levier e serer les portaus.
Le jors eurent heüs un crüel batistaus.
L’enperere en son tref fu forment d’ire caus ;
Anz ne l’ousent garder François ni Provençaus :