Vers les tendes tornerent, s’ont perdue lor vitoire.
Quant s’an apercuet Carles, par pué non s’en despoire,
Qe voit fuïr ses homes, q’uns ne veult remanoire
Por manaces que il face ne promisses d’avoire.
Se cil Sire n’en panse, qe maint et regne en glorie,
Daumaje i recevrunt nos Frans avant la soire.
François se sunt rompuz entr’aus meiesmemant
Por ce qe s’est partiz Rollant, le duc d’Anglant.
L’enperer, quant les voit, a pué d’ire ne fent ;
Il a gardez a destre, a suen arestemant,
Le cont Hue percuet, par mié l’escuz le prent.
« Par qoi », feit l’enperere, « s’an veit arier ma gient ? »
Le cont Hue se taist, ne respondi nïent.
Es vos quens Gaynelluns escriant fierement :
« Rois, panse de ta vie et de nos ensement,
« Car garpiz nos a hui le ton melor parent :
« Alez s’en est Rollant, dunc nun sas tu nïent ?
« Ainz més non fist baruns un si fol partiment.
« Je ne sai par qeil ovre o per qeil pensament
« Il s’an reveit en France sans ton comandemant.
— Est ce voir ? » feit le rois. — Oïl, par san Climent. »
Le rois si garde ariere, o l’orieflor resplent ;
Ne voit la gient ses niés ; a pué le cors n’i fent.
Irez fu l’enperere e dist : « Par saint Silvestre,
« De ploisors grant outraje et ovres desoneste
