« Ensi soit, sire ; mort soit qui le devee. »
Rolant l’oï ; le colors a douplee ;
De si grant grace a molt remerzïee
L’aute Vertu qui li avoit donee.
« Que faites vos ? » ce li a dit Sanson.
« A quoi baés ? allés prendre le don.
« Mon pere e moi bien vos i mantiron. »
Adonc s’est mis Rolant a geneillon ;
Voiant trestuit, a dit fiere raison :
« Sire, je sui a fer tot votre bon.
« Par tiel cunvant recevrai le baston
« Que senz engins et senz penser felon
« Metrai in obre ma pobre cuisençon
« A sostenir in ceste grant region
« Le vetre honor et dou voutre roion,
« In mals e in mort et in destrucion
« De Malquidant et de cant que a lui son. »
Lor prant la verge cun grant devocion.
Soudans l’endrece amont par le menton.
« Lieve », dist il ; « que l’autisme Mahon
« A governer bien ma tere toi don. »
Ci defeni le consoil l’Aumasor ;
De le chanbre insent li grant et li menor.