A .x. tüel de cobre fesoit ses giteïs ;
Sor ceschuns de tüels estoit un Arabis
De cobre, tuit armei, laboreis et stampis ;
Ceschuns tenoit l’espie e l’eschu a son pis.
E sor l’autre piler, ce conte li escris,
Desor une cariere, sot un arbre floris,
Seoit un roy de cobre, ne troi gran ne petis ;
Et ert si engignei sor lu un edifis,
Quand vent i fiert, brait cum fust asotis :
Entor l’arbre tornoit, corand tot escaris,
Con s’il vousist defendre le font el pleiseïs.
Au pié de la fontaine, ou colent li tüel,
D’une piere mabrine i avoit gran vasel
Tot plein d’une clere aigue deci qe en le orel.
Devant le cours de l’aigue oit un edifis bel ;
Por force de cours fiert sor l’englume un martel ;
N’i ousent aprochier ni bestie ni oisel.
Environ la fontaine avoient mant pustel ;
Por les chevaus liger estoient mis anel.
Le pere ou roy Marsille, quand estoit jovencel,
Fist la fontaine feire a un mestre, Clarïel :
Ne avoit maudre en Espagne de labor de quarel.
Ilucque prist Rolland cele nuit son ostel.
Por devant la fontaine, und l’aigue est clere e pure,
Descend le niés Karlon o la noble figure.
