La cité prise et oncis l’amirant ;
De convertie gient menerent planté grant,
Les quatres Diés, qe herent d’or e d’arçant,
Car et caretes, roncins et muls anblant
Toz cargiez de vitaille, pains et vins et formant.
Tant chevaucerent a grant joie feisant
Qe il de Pampaloine verent le fermamant
E les grans host de Françe et de Breibant.
Rollant apelle Hestous tot in riant :
« Coisins », dist il, « je croi veraiemant
« Qe troverons le rois de mautalant. »
Respont Hestous : « Il avra droit auquant :
« Ne est mie peu a si greu pont et grant
« Leiser un roi en storme combatant.
« Trop nos partimes, bias sire, folemant,
« E je por moi n’en veul savoir noiant
« Ne le primer ne lui irai davant :
« Qi a forfeit en recoile tormant. »
Lor dist li quens : « Ancor ne m’an repant,
« Qe, merci Diex, nos feit avomes tant
« Qe la merci mon oncle nos sera bien aidant. »
A ce qe disoient li baruns natural
Tot ensi pensoient les autres por engal
E conselent entr’aus, por le partir en fal,
De non veoir le roi le vis enperial,
Tant redotent l’eror de lor sir natural :
A lor tendes iront desarmer comunal.
Quant il sunt devalé le pendant d’un costal,
Rollant fist desploier le confanons real,
Soner feit cors et tinbres, tambors et çeremal.
- ↑ — 11025 E conseleurent.
— 11002 oncise — 11003 plantee — 11006 Toz manque — 11014 mie pue