Et Oliver lor oncis Malaquin ;
Gerart, Galan ; e Berenger, Maurin
Chi tient de Combre li grant palés mabrin.
Bien i firent nos François palatin,
Chier s’en vendent sor la jent Apolin.
Rolant en feit martir e desiplin :
Chi il consuit, mout est pres de sa fin.
Le niés Çirart lor fu felon visin :
Tient Autecler, che li deit Joachin ;
Lui ne dure heume ni obers doplentin ;
Sovant escrie : « Monjoi, li fil Pepin ! »
Mais tant en sunt de feluns Saracin,
Setante mil e plus en un traïn :
Chi firent d’aces, chi de brant acerin.
Por droite force, ce conte li latin,
Sunt nos François getés ors deu çamin.
Se li fusent esté li merveilans
De ce che di des compaignon Rolans
Che por l’encharje des Paiens gros e grans
Fusent esté por forçe reüsans,
Ci non seroie tenuç a mesdisans.
Se or m’escoute mariner o estormans,
Panse en son cuer e’n sera remembrans
S’il vit ja niés, dormuns, barch ni çalans
Ancrer en mer, quant il est redotans,
Puis vient traverse e si tres fier tormans
Che, s’il ne veut noier cil ch’est dedans,
Il leve l’ancre, pensis et sospirans,
Mener se laise as vent outre talans
- ↑ — 7796 B corrige rehusans — 7799 en manque — 7800 Si uit lames — 7801 redorans — 7804 lantre.
— 7785 an tecler — 7786 dopletin