De celui garniment fu mult en grant esfrois ;
De Tollete se muet, a l’ainz q’il puet anchois,
E vient a Saragoçe, eu regne Aregonois.
A Saragoçe vient Marsille consoil querre
Et oit ensemble lui des barons de sa terre
Plus de .c. et .l., que servis lui doit fere.
La senblance Carlons lor comançe a retrere,
Le garnimant q’el feit et tot si cum il here
E de cels qe ja sont venuz enz la Navere.
« Segnor, conseillez moi, car je redoit de gere. »
Respondre a teil parole n’i a Paiens che sace.
Li beus Jonas de Cordes de dos son mantel saçe ;
Mout fu beus et membruz et en cors et en face.
Il a dit a Marsille : « Tu fais come la brace,
« Quant li çaelz sunt nez, qe brait c’om les abrace.
« Noz savonz bien acertes qe Çarlons nos porcace
« De venir en Espaigne, ne ci non vient sa trace,
« Qe par tot som peïs n’i a port q’il ne face
« Aprester de nager vers Persse o vers Dalmace.
« Quant Carles no t’agreve, ne desfie, ne manace,
« Por quoi dois tu mostrer couse que lui desplace ?
« Qe leira pax por gerre, Machomet lo desface !