Page:Anonyme - Huon de Bordeaux, chanson de geste.djvu/223

2823—2856

85

Huon de Bordeaux

Quant furent bien garni et apresté,
Garins ala sa moillier acholer
Et ses enfans baisier par amisté ;
Puis ne les vit en trestout son aé.
Au departir i ot grant duel mené.
Ens la nef entrent tout li .xiii. adobé ;
Onqes n’i misent serjant ne baceler,
2830Nis .i. garçon por les cevax garder,
Fors .ii. vallés qui sorent govrener.
Quant ens lor nef se furent atorné,
A Jhesu Crist se sont tout commandé,
Sacent lor ancre, si s’espainent en mer.
Et nostre Sires lor donna tel oré
Q’en .xv. jors sont là outre arivé.
Quant sont à tere, sont es cevax monté ;
Tot lor avoir ont erroment torsé,
Vers le Sepucre se sont acheminé.
2840Tant ont ensanle esploitié et erré
Q’en Jhrusalem sont .i. mardi entré ;
Desc’au Sepucre n’i ont regne tiré.
Dont dessendirent des destriers sejorné,
Puis vont le lieu véoir et esgarder
U Jhesu Cris fu couchiés et posés.
La lance virent, sel baisierent asés,
Et puis revinrent el temple d’outre mer ;
L’autel basierent ù Dix fu presentés,
Là ù Diex meismes ot le messe canté.
2850Dont se couça Hues devant l’autel.
« Vrais Dix, dist il, par vo sainte bonté,
« Si vraiement que en Belleant fu nés,
« Puis fustes, Sire, en cest temple aportés,
« Et sour l’autel et offers et donnés,
« Saint Simions vous reçut sans fauser ;
« Ainc n’ot véu en trestot son aé ;