Pour l’ame son amy, que ne poelt oubliier.
De la bielle Flourenche lairay un paul ester,
Et, quant il sera poins, bien saray retourner.
De Gharssille volray un petit deviser,
Qui se faisoit as trez noblement desarmer ;
Moult maneche Ronmains de le teste couper.
Li rices rois Ghassilles ot a son coer pesanche
Que Ronmains li ont fait si faitte destourbanche
Et ses honmes ochis a doeil et a vieutanche.
Il en jure de coer trestoutte la poissanche
Que ja joie n’ara, se il n’en a venganche.
Il se fist desarmer sans nulle detrianche,
Moult estoit fiers li rois et d’orible samblanche,
Au mengier s’est assis o se mainsnie franche,
Et apriès le mengier dedens sa tente blanche
Fist mander Esmeret, qu’ot le coer a doubtanche ;
Jhesucris reclama et sa dingne poissanche :
« A ! Flourenche », dist il, « con dure desevranche !
Or me couvient morir a dueil et a mescanche.
C’est pour l’amour de vous que ceste mort m’avanche,
Car trop m’aventuray, dont je fis ignoranche,
Mais che fu pour avoir le pris et l’onnouranche ;
Bien doy avoir pardon, car che fu droitte enffanche.
Aÿ ! Millez, biaus frerez, plains de grande vaillanche,
Con vous aréz pour moy a vo coer grant pesanche ! »
Esmerés fu dolans, car le mort redoubta.
Devant Gharssille vint, doucement l’enclina.
Quant Gharssillez le vit, asséz le regarda ;