Quant la bielle l’oÿ, a tiere se pasma,
Oncques si dolans coer au monde ne rengna
Que li coers de Flourenche, quant on li recorda
Que mors fu Esmeréz, ou elle s’adonna.
Adont de piteux coer elle le regretta :
« Aÿ ! » dist elle, « amis, con grant mesquief chi a !
Vous estiés li plus biaus c’oncques Dieux estora,
Preus, sages et courtois ! Dieux, qui vous ordonna,
Nulles riens a vo corps li Sires n’oublia.
Grascieus, doux, loyaux ! Science vous donna.
Pleuist a celui Dieus qui me fist et fourma
Que fuisse morte ossi, désiré l’ay piech’a,
Car je sçay bien de fy que mesquief m’avenra,
Car li-cours des estoilles piech’a le me moustra. »
Enssement la puchielle adont se dementa.
Dollante fu Flourence, la puchielle au vis cler.
Qui li oïst adont Esmeret regreter,
Sa biautet, sa valour et son sens deviser
Et sa mort couvoittier pour son amy trouver,
D’unne grande pitté li peu wist ramembrer !
Li baron dou paÿs le vont reconforter ;
La li vint Agrevains et dire et recorder
Conment en la battaille vit Esmeret thuer.
Droit au moustier saint Piere font la messe chanter,
Li pappes le canta, qui moult fist a loer ;
Pour le bien qu’il oÿ d’Esmeré recorder
Pria devottement et fist reconmander.
Legaux et cardenaux le vont moult regreter,
Puis ensevelis fu a loy de noble ber,
Et puis vont ou palais Flourenche viseter,
Qui faisoit a tous povres de son argent donner
- ↑ 1812 au vifs — 1816 De.
1802 conme — 1805 vos ; n’ manque — 1806 doux et
