Que me voeilliés aydier a faire me penssee,
Car mors est Esmeréz, il a la vie ostee,
Ja mais ne revenra, c’est verités prouvee,
Si poéz ceste chose bien avoir demenee
Que ja n’en averéz reproche demoustree
Par nul honme vivant qui en sache riens nee.
— Sire », dist Agrevain, « tout a vo devisee ! »
Adont li a le foy plevie et creantee
Tout enssi le fera sans nulle demouree.
Dont fu la char Sansson la endroit desarmee,
De sancq et de sueur fu sa fache foullee,
Dessus un blazon fu la char de lui pozee ;
A quatre chevaliers fu la chose livree
Qui savoient trestout le traÿson prouvee
Enssi que je vous dy, Milles les encanta,
Par proumettre biaus dons enviers yaus s’acorda,
Et cascuns de sa foy la endroit li jura
Qu’il feront et diront trestout che qu’il volra.
La battaille fu grande, Gharssille reculla,
La forche fu Ronmains, car bonne gens y a.
Ja fuissent desconfy li Grigois par decha,
Quant Milles de Hongrie le retraitte sonna,
Viers Ronme s’est retrais et grant doeil demena,
Le bierre fist porter, samblant fist qu’il plora ;
Disent c’est Esmeréz c’on en reportoit la.
Ronmains furent dolant, fourment leur anoya,
Cascuns le regretoit, tous li peullez l’ama,
Et maudient de coer chelui qui le thua.
En Ronme sont rentré, ou li noise monta ;
Mis fu en unne bierre li corps, c’on y poza ;
Ens ou moustier saint Piere yloecq on le porta.
A Flourenche fu dit conment li chose va ;
- ↑ 1784 erre (?) b : — 1787 Deuiers — 1795 yloecques.
