Enssi con li baron vont d’Esmerer parlant,
Ont veü son cheval, qui s’en aloit fuiant
Au lez par deviers Ronme le rengne traienant :
Dont furent li baron courechiet et dolant.
Et Milles leur aloit haultement escriant :
« Signeur baron », dist-il, « or chevauchons avant,
Se querrons Esmeret, le chevalier poissant !
Se mort l’ont li Grigois en cel estour pesant,
Ja mais n’aray le coer baut ne liet ne joyant ! »
Lau Esmeréz fu ne va mie ensengnant,
Mais a l’autre coron les va Milles menant ;
Et le bers Esmeréz s’aloit fort combatant.
Es vous le roy Gharsille qui le va regardant !
Quant le voit en battaille si tresbien combatant,
Que de ses honmes va le plache delivrant,
Tiestes et piés et bras leur aloit decoppant,
De son grant hardement se va esbahissant.
A haulte vois li dist : « Et c’or te vas rendant !
Tu ne poés escapper par nessun couvenant. »
Quant Esmeréz l’oÿ, si mua son samblant,
Devant le roy Garssille va ferir Ghallerant,
Nez de Coustantinobles, unne chité moult grant ;
Et Esmeréz le va tellement assenant
Que jusques le poittrine li a mis le taillant,
Et puis va le second le diestre brach coppant,
Et le tierch enssement la chiervielle espandant.
Quant Gharssillez le voit, a se gent va disant :
« Prendés vif ce vassal, car je le vous conmand ! »
Adont l’ont assali et derriere et devant,
À force et a viertu le vont si cuvriant
Qu’il ont mis a genoux ; la le vont assalant.
Ungs Grigois est venus contre lui bouhourdant,
- ↑ 1641 conme — 1643 leur rengne — 1653 Et — 1657 Et de — 1671 Qui.