Par quoy li fier Ronmain, qui sont en ceste pree,
Ne puissent dire en yaus par nesune posnee
Que la puchielle soit nichement mariee ! »
Quant Esmeréz l’oÿ, moult tresbien li agree,
Cuida que la parolle fust pour bien recordee ;
Mais c’estoit a la fin qu’il euist le pensse
D’entrer si fort avant sur celle gent dervee
Que ja mais a nul jour n’en fezist retournee
Quant Esmeréz oÿ le sien frere parler,
Adont si conmencha li siens coers a lever :
Et a la grant biauté de Flourence pensser.
Amours et hardemens le firent si haster
Qu’em le plus grande presse s’ala si fort boutter
Par forche le fendi et va dedens entrer ;
A diestre et a seniestre prist gens a decopper,
Chevaliers saudoiiers a tiere craventer.
Milles a fait ses gens arriere reculler,
A unne aultre battaille les a fait assambler ;
Et rewarde tout dis se venra retourner.
Le sien frere Esmeret, qu’il ne pooit amer,
Mais enclore le vit, assalir et viersser,
Abattre du cheval et tout jus souviner.
A soy meïsmes dist : « Or voi ge bien au cler
Que mes freres est mors ; il ne poelt escapper.
A ce cop me feront li Ronmain espouser
Flourenche la puchielle, qui le viaire a cler ;
Il n’est honme en ce monde qui le me puist oster, »
A tant es Agrevain et Sansson, le boin ber !
Venus sont a Millon et s’ont pris a criier :
« Milles, ou est vos frerez ? Ne le voeilliés cheler ! »
Et Milles respondi : « Je ne le puis trouver. »
- ↑ 1619 si manque — 1625 Cheualier saudoiter — 1628 rewarder — 1629 qui ne — 1636 peuist ester.
1615 que il
