Mais une espie vient a Gharsille nonchier
Que li Ronmain venoient, qui furent cent millier.
Quant Gharssille l’oÿ, n’y ot que courouchier ;
Il a dit a se gent : « Pensséz de l’esploittier,
De ces felons Ronmains ochire et detrenchier !
Me cuident il tollir Flourenche le mouillier ?
Je seray leur drois sires, qui qui doie anoiier ;
Encor le comparont tous li plus hault princhier,
Quant il n’ont obeÿ sans a moy battayllier. »
Dont fist maint cor bondir et se gent chevauchier,
Ses banierez royaux contre vent bauliier.
N’alerent point avant, si conme j’oy nonchier,
Quant il virent Ronmains, qui tant estoient fier ;
La n’orent point loizir de plenté manechier.
Lors ferisent enssamble a plain corps de destrier,
Il crient leur enssengnes pour leur gent raliier
Et fierent l’uns a l’autre pour trestout desfroissier.
Bien sambloient diaublez qui fuissent hors d’inffier,
Qui volzissent le monde craventer et mengier.
Al conmenchier l’estour fu fiere le meslee :
La y ot mainte enssengne a la tiere vierssee,
Et de maint boin cheval saloit la boyellee.
Li uns y fiert d’espoy et li aultres d’espee,
De glave u de faussart u de lanche acheree ;
Li uns escrie « Ronme ! » tout hault a le volee,
Li aultres se rent pris moult hault a grant alee.
.................................................
« Aÿ ! frere Esmeré, veschi noble journee !
Pour Dieu, repandons sancq et viertu esprouvee,
- ↑ 1605 glaues — 1607 Après ce vers, il doit manquer un ou plusieurs vers dans lesquels il était dit que Milan adresse la parole à Esmeré — 1609 repiendons.
1588 seray répété ; sires drois — 1589 Encore — 1590 a manque — 1594 ronmain — 1598 frirent li vns
