Quetis, malleürieux millez fois s’esclama.
« Par foy », dist il en ly, « li diauble tentet m’a !
Je ressamble a celui, par Dieu qui tout crea,
Que che qu’il tient as mains a ses piés gectet a.
Moult fu Milles dolans, drois est qu’il lui anoye ;
A lui meïsmes dist : « Bien morir je voldroie,
Quant par my ay pierdu unne si bielle proye ;
Or sui plus que devant en l’amoureuse voie,
Et plus m’esprent li coers et art et me desroie.
Par celui saint Signeur qui tous les biens envoye,
Je le volroie avoir, si qu’elle va le voie,
Et ja mais dou royaulme je ne tenisse roie ;
Car tant par est plaisans et bielle et douche et quoye.
Pleuist Dieu que son corps je truisse en la broye,
Ja mais a Esmeret je ne le renderoie !
Las ! pour quoy l’a il prise ? Mie ne le cuidoye.
Che c’on poet faire anuit n’est nuls qu’agarder doye
De chi jusqu’a demain, que li solaus flamboye.
Mais, se plus m’avenoit que ja la garderoie,
Se peüsse exploittier, point ne me fainderoye.
Par Dieu, trés volentiers Esmeré le tauroie,
Car sans le mien consseil il est mis en la voye
Et pour my s’est hastéz, affin que ne soit moye.
Or seroit moult bien fait, se je le reculloie. »
Enssi disoit Millons, qui en se chambre estoit,
A la bielle Flourenche moult durement penssoit,
Et Amours par son trait moult fourment le trayoit,
