« Par Dieu », dist Esmeréz, « pas ne dist courtoisie !
C’est drois que, s’il l’a dit, qu’il li tourne a folie,
S’il me vient aucun bien et que Dieus le m’ottrye.
Il est hoirs dou royaulme qui vient de me partie ;
S’il est rois et jou rois, che sera signourie. »
Dont fu grande la joie en la salle voultie,
Il n’y a chevalier l’un a l’autre ne die :
« Il est vray qu’Esmeréz a no dame plevie. »
Un escuiiers Millon a la nouvielle oÿe
Qui queroit Esmeret a la chiere hardie.
Quant il oÿ la chose, qui par tout est nonchie,
Viers la chambre Million a se voie acoeillie,
Dolans et courechiés, faisans chiere abaubie ;
Mieus amast qu’a Millon fust la dame ottroiie,
Pour che qu’aucuns pourffis en fust en se partie.
Ly escuiiers s’en va, qui point ne s’arriesta :
Venus est a Millon, sur son lit le trouva.
Ylloecques buzioit, moult lui anoyoit la
Pour ytant qu’il ot dit, quant on lui otroya
Flourenche la puchielle, qui tant de bontet a.
A tant ez l’escuiier qui hault le salua,
Puis a dist : « Mon signeur, la besoingne mal va,
Car Flourenche de Ronme le vostre frere ara.
Fais est li mariagez, si qu’Esmeréz sera
Empereres de Ronme, ou noble royaulme a,
Et s’ara la plus bielle c’oncques Dieus estora. »
Quant Milles l’entendi, tous li sans li mua,
Si dolans fu au coer qu’a poy qu’il n’esraga ;
Il estraindi les dens, les yeus esrouïlla,
- ↑ 1419 et moult — 1420 o d. — 1422 A t. lescuiier est — 1429 que il.
1402 dist et Esmeréz sont intervertis — 1403 sil a d. qui le — 1404 Se il — 1406 Se il — 1407 salle saultie — 1410 millons — 1413 Deviers — 1414 courchies : abaudie
