— Je demant vostre amour, n’en doy yestre escondis,
Quant j’ay la vostre aniel, qui tant est signouris,
Que je rechoy en gré conme vostre subgis ;
Et, se chou vous demande, ja n’en soie haÿs,
Car Amours, que je siers et sierviray tout dis,
M’a donnet hardement, volenté et avis
De requere teldon, c’est vo douche mierchis.
— Esmeréz », dist la bielle, « seriés vous si hardis
Que de prendre m’amour, me tiere et mon paÿs ?
— Oÿl », dist Esmeréz, qui fu biaus et faittis,
« Et fust vostre li tiere de chi jusqu’a Paris
Et tant en revelant jusqu’au port de Brandis ! »
Quant Flourenche l’oÿ, s’en a jecté un ris.
Flourenche la courtoise fu a son coer moult lie,
Quant oÿ Esmeret a le chiere hardie,
Dont manda la puchielle toutte se baronnie,
Agrevain et Sansson et chiaus de leur partie,
Et chil y sont venu, que nuls ne s’i detrie.
La puchielle parla, pas ne fu esbahie :
« Signeur », che dist Flourence, « par vostre courtoisie
M’aviéz eslut signeur tout a vo conmandie
C’on appielle Millon, fil o roy de Hongrie ;
Mais j’aim mieux Esmeré et pour chou vous supplie
Que vous le me donnéz, si feréz courtoisie. »
Et disent li baron : « N’est nuls qui le desdie. »
Tout ont a Esmeret la puchielle ottroiie
Et acordet trestout apriès gherre falie.
Dont fu liés Esmeréz a le chiere hardie,
Et la li dist Sanssons de le grant villonnie
Que ses frerez Millons ot dit par estouttie.
- ↑ 1386 le hardie chierie — 1387 Adont — 1391 v. amiste — 1392 Mariez — 1394 jainme — 1397 a manque — 1400 grande.
1372 demande — 1375 soiies — 1383 jusqua port a
