Sanssez, a qui il fist si grandez amistéz,
Dist qu’Esmeréz l’ara et qu’il en yert doéz,
Et Agrevains estoit fourment entalentéz
Que Milles l’espouzast, car par lui fu tensséz
En le grande battaille, enssi qu’oÿ avéz.
« Signeur », dist Agrevain, « enviers moy entendéz !
Chil enffant sont moult noble, enssi que vous savéz,
Car leur perez si fu noblez rois couronnéz :
De Hongrie fu rois, si en tint les rengnéz.
Milles est li drois hoirs, Esmeréz est mainsnéz,
S’est Milles plus vaillans et a plus d’iretéz,
Si en serons plus fort, s’il est nos avoéz,
Car rois et empererez polra yestre nonmez,
Ronme pora tenir et Hongrie daléz. »
Dist Sanssez de Tarente : « Il est rices asséz.
Laissiés l’en sa riquesce et son frere prendéz,
Car c’est trestout d’un sanch, roy les a engenréz.
Puis que li uns est rices et l’autre est caséz,
Enssement y ara deus rois bien honnouréz. »
Et li baron li disent : « Pour noient en parléz ;
Nous volons que Millon soit nos drois avoéz. »
La endroit fu li plus contre le mains portéz.
Or sont trestout d’acort li prince et li baron
Que Flourence de Ronme volrent donner Millon.
A la cambre a la dame sont alé a bandon ;
La fu li senescaux c’om clamoit Clarion,
Richier le sinatour, Agrevain et Sansson
Et maint boin chevalier dont je ne say le non.
La puchielle trouverent en grande marison,
Et bien souvent au coer avoit avision,
- ↑ 1244 habandon.
1221 que il en est — 1224 que oy — 1231 se il — 1235 Laissielle en — 1238 E. y ra — 1239 li disent li baron — 1240 nos manque
