Et fu telle clarté alumee et furnie
Que n’est nuls homs vivans qui le voir vous en die,
L’endemain au matin y fu la messe oÿe
Dou boïn pappe Simon, qui en fist le maistrie,
Noble fu li offranche et fourment esprisie :
Un cheval tout couviert, quoy que nuls vous en die.
Des armes que portoit li rois de Ronmenie
Uns chevaliers fu fais, qui fourment s’umelie.
La ot maint cheviel trait, mainte barbe sacquie ;
Dieus ! que Florenche estoit a son coer courouchie,
Sa destraiche fu grande, pierdre volzist la vie !
Li chars dou boin roy fu moult bien ensevelie ;
Dont yssi dou moustier toutte la compaignie,
Viers le palais maiour ont leur voie acoeillie.
N’ot povre en la chitté a qui ne fust baillie
L’aumousne tellement que cascuns pour lui prie.
Apriès che que li rois Ostez fu enthieréz,
Repaira ou palais tous li riches barnéz.
Bien y fu fiestiiés Millez et Esmeréz,
Sur tous les chevaliers leur fu li pris donnéz ;
La fu cascuns des deus tellement alozés
C’on les a moult fourment prisiés et honnouréz,
Car il furent pour vray de tresgranz parentéz.
Sansses et Agrevains et des aultres asséz
Alerent a consseil — c’est fine veritéz —
Pour prendre avision, telle con vous oréz,
Que li corps de Florence puist yestre assenéz
A l’un de ces deus frerez, que les corps ont moléz.
Li uns le donne a Mille, pour che qu’il fu ainsnéz,
Li aultrez vaelt que soit a Esmeré donnéz.
- ↑ 1206 A manque — 1208 fust — 1212 tresgrant — 1215 conme — 1219 Li a. sest ossi a.
1191 Qui — 1193 maistrise — 1201 moult seuelie — 1202 Adont
