Pour le roy, qui fu mors et qui gist em my l’aire :
Moult le vont regrettant, et lui et son affaire.
Dist li coms Agrevain : « Signeur, pour saint Hilaire,
Laissons le doeil ester, si penssons de bien faire
Par quoy puissons vengier l’empereur deboinnaire
Et qu’a honneur puissons de chel estour retraire ! »
Adont les veïssiés ferir, lanchier et traire !
La orent li Grigois un moult crueus sollaire,
Car li gentil Ronmain leur firent moult de haire ;
Mais dou roy, qui fu mors, orent lait exenplaire.
Fiere fu la battaille que il ot a ce jour ;
Grant noize y vont menant et nakaire et tambour,
Et Grigois se combattent a forche et a vighour.
Enssi ceste battaille dura trestoutte jour,
Que li Ronmain ont fait enviers Ronme retour ;
Sur un blazon em portent Oste l’empereour.
Et d’une part et d’autre orent moult de dolour,
Que les deus os partirent et laissierent estour.
De la gent de Ronmaingne sont navré li pluisour,
Et ossi sont Grigois, li felon boiseour,
Mais a chelle journee il en orent l’onnour.
Li Ronmain s’en revont a Ronme le maiour
Plourant et larmoyant, plain furent de tristour ;
En la chittet entrerent sans joie et sans baudour.
Quant la nouvielle seurent en la chité entour,
Dont furent moult dolent en tristeche et em plour
Et dames et puchielles, chevalier vavassour ;
Trestoutte li chitéz environ et entour :
En fu a ceste fois navree de dolour.
Quant Flourenche a oÿ le doeil et le hidour
Et vit le grant murmure et le tresgrant estour,
- ↑ 1139 F manque — 1142 durra — 1148 sont li g. ; briseour — 1151 furent manque — 1154 tristieche — 1158 la oy — 1159 Et il ; la tresgrant.
1133 lempereour — 1137 li f.
