Queroient l’empereur a mouit riches conrois,
La battaille pierchierent a leur brans viennois,
L’empereour trouverent par dessus les thierois,
Qui tant avoit feru dessus les maleois
Qu’il estoit si navréz ne se pot tenir cois,
Ains estoit a genous, la crioit demanois :
« Ronme a l’empereour ! » Mais ne vault unne nois,
Car, ains qu’il fust rescoux, fu mis a tiere cois.
Ung Grieus le fery si d’un riche fier danois
Le hiaume li fendi, c’ou quief li fu estrois ;
Li chiervielle en saly, la queÿ mors tous frois.
Milles et Esmeréz et Ronmain trente et trois
Vinrent a l’empereur ; la fu grans li effrois
Et li ochisions et vaillans li tournois.
Dont y vint Agrevains, Sansses et Ghodefrois.
Quant il virent le roy, dont fu grans li effrois ;
Le riche empereour regrettent mille fois.
Par dessus un blazon fu pozés li frans rois,
D’illoecq l’ont eslongiet chevalier et bourgois.
Au dehors des battailles et dou peuple grigois
Fu li rois aportéz, che tiesmoingne le vois.
Quant Gharssilles le seut, si en leva ses dois :
« Aÿ ! vrais Dieus », dist il, « tu soies beneois !
Mors est li orghilleus, pierdus est ses buffois ;
Or en menray Flourenche, s’en feray mes deghois. »
Moult fu joyans Gharssilles, quant il oÿ retraire
Le mort de l’empereur, qui lui estoit contraire ;
Jhesucris en loa, le Pere deboinnaire.
Et li aulcun Ronmain ne finoient de braire
- ↑ 1125 orghilleur — 1125 M manque — 1126 estoient — 1128 brare.
1100 riche — 1102 Lemperere ; dessaus — 1105 de manoirs — 1106 lempereur — 1109 Le premier li manque — 1114 Adont — 1116 emperereur regrette — 1118 Dilloecques
