Adont dient Ronmain qu’il sont boin chevalier
Et que il sont bien digne de tiere justichier.
La veïssiés battaille et estour moult plainnier,
Mainte enssenggne versser, mainte lance brisier
Et courir par les camps maint auferant destrier,
Tous leur boyaus traynnant, sans sielle et sans estrier,
Et les fuians fuir, les aultres esmaier ;
Li sans qui des corps ist si fait l’ierbe cambgier.
Oncques depuis le tamps Alixandres d’Aillier
Ne vit on tel estour ne si fort ne si fier,
Et furent a ce jour, tout pour vray sans cuidier,
Que d’une part que d’autre bien quatre cent millier
Qui fourment se penoient de l’un l’autre essillier.
Signeur, ceste battaïlle dura moult longhement,
Et d’une part et d’autre en moru grandement.
Millez et Esmeréz y fierent asprement,
Cascuns endroit de soy s’i maintint vaillanment.
En la chité de Ronme y ot grant criement,
Les dames de la ville plouroient tenrement
Et vont par ces moustiers priant moult douchement
Que Dieus voeille ottroiier le victore a leur gent.
Li pappes en prioit asséz soingneusement
Et tout li cardinal et li clercq enssement ;
N’ot clocque en le chité ne sonnast haultement.
Et Flourenche prioit a Dieu omnipotent
Que Dieus li ramenast par son conmandement
L’empereour, son pere, qui tant ot hardement,
Et tous les hauls barons, dont il y ot granment,
Et les deus damoiziaus, qui tant estoient gent.
Or diray de lestour, si vous vient a talent,
Ou li Ronmain pierdirent a ce jour grandement ;
Car li boins empererez s’avancha folement
- ↑ 1056 Et vons.
1037 d. li r. qui — 1039 plaimier — 1046 vit oncques
