Que je puisse tant vivre que chieus fais soit rendus,
Car tantos fuisse mots, se ne fuissiés venus,
Moult fu sages li rois, qui vous a retenus,
Car par vous et vo frere ay esté secourus.
— Or tos », dist Esmeréz, « de ce ne parlés plus,
Mais alons assalir les felons mescreüs,
Car a tort est par aus li paÿs confondiis. »
Adont fu li estours fièrement maintenus :
La fu maint homs navréz a le tiere estendus,
Du sancq et des boyaus qui furent fors queüx
Estoient grant li rieu qu’en maint lieu sont courus.
Garssilles li Grigois fu moult tristres et nuls,
Quant voit li empereres est si bien deffendus ;
Il a dit as Grigois : « Je ne vauch deus festus,
Se chieus enffes ne m’est appiertement rendus. »
Adont a ses conrois fierement recreüs ;
Il a ses cors bondis c’on les a entendus.
La noise c’on menoit et les cris et les hus
Oÿst on a ce jour de unne lieuwe ou plus ;
Oncques puis qu’Alixandres combati a Porus,
Ne fu si grant estour ne si fier maintenus.
Forte fu la battaille, moult fist a resoingnier ;
Bien s’i proeuvent Ronmain, qui sont boin chevalier,
Et ossi font Grigois, qui moult estoient fier.
Milles et Esmeréz n’ont soing d’iaus espargnier,
Par leur haulte proesche se firent moult prisier,
N’y a cel ne se paint de s’onneur essauchier,
Car a ce jour y orent les plus grans boin mestier :
Agrevain secoururent, che fu toute premier,
Et apriès l’empereur rendirent un destrier ;
Et Sansson de Tarente firent il redrechier.
- ↑ 1032 se painnent — 1034 y coururent.
1015 fors manque — 1019 au gr.
