Tant s’esploitta li rois, dont je vous voy comptant,
Qu’il est venus a Ronme et se loga devant ;
Illoecq furent tendu si tref et si brehant.
Et jura Jhesucris, en qui il fu creant,
Que n’en retournera n’en yra repairant,
S’ara conquise Ronme, la chité souffissant,
Et si ara Flourenche, qui qu’en pleur ne qui quant,
Et destruira le roy, qui le va refusant,
Et trestous cheux ossi qui li vont conssillant.
Trestout jusques as portez vont il le feu bouttant ;
Quant li Ronmain les virent, si en furent dolant.
Ostez li empererez en va se loy jurant
Qu’il ystera de Ronme apriès soleil levant.
Li empererez Ostes point ne s’i atarga,
Esranment fait nonchier — un siergant le cria —
Que droit a l’endemain, quant solaux levera,
Soient tout apresté, car combattre volra
Contre le roy Gharssille, qu’enssement assis l’a ;
Et chil le sont ossi, conme il le conmanda.
L’endemain au matin la trompette sonna,
Dont se vont adoubant que nuls ne s’ariesta.
Ostes li empererez noblement s’adouba,
Milles et Esmeréz, ou biaus damoiziaus a,
Se sont moult bien armé ; bien fu qui les ayda.
Ostez li empererez ses battailles renja :
Li gentieus marissiaus le premiere mena,
Et puis un sinatour, que Thitus on nonma,
Apriès le marissal noblement s’aroutta ;
Et Sansse de Tarente la thierche ghouvrena,
Et Agrevain le quarte, que point ne s’atarga,
- ↑ 871 quenssement quassi — 875 se a. — 878 b. ordonna — 879 L g. — 883 Et manque.
855 Que se il — 856 Illoecques ; tendue — 858 Que mais nen — 865 si loy
