La ou il festioit Esmeret et Millon.
Elle les regarda asséz et a foison,
Puis revint a la bielle qui Flourence ot a non :
« Dame, par celui Dieu qui souffri passion,
Oncques ne vy plus biaus en nulle region.
L’un est ainsnés de l’autre, n’ont barbe ne grenon,
Il ont les yeus plus vers que les yeus d’un faucon,
Cheviaus recercelés, plus ghaunez que laiton. »
Quant Flourenche l’oÿ, si rougy le menton ;
Adont vint a la bielle o coer avizion
Que l’un de ces deus la aroit elle a baron.
En ce point l’a laissiet, tant que vint la saison
Que fu tamps de soupper, que l’iauwe corna on.
L’empereres s’assist, qui moult ot de renon ;
Il avoit a se table Agrevain et Sansson,
Le marissal de Ronme, c’on nonmoit Clarion.
D’autre part fu assize par moult gente fachon
Flourence le courtoise, que Dieus fache pardon !
Milles et Esmeréz, dont j’ay fait mention,
Se sont mis au siervir de porter le paon ;
Devant l’empereour sont mis a genouillon
Et puis devant Flourence ont fait repairison,
A la quelle il ont fait douche inclination.
Et la bielle entra lors en grant abuzion,
À soy meïsmes dist la puchielle de nom :
« Sainte Marie dame, qui portastez Jhesum,
Ou quel feray amit en consolation ?
Il sont andoy si biel, n’y say comparison. »
Mais, quoy qu’elle penssast en sa condition,
Adiès a Esmeret avoit s’opinion
Et le prist a amer a son intention.
Quant vint apriessoupper, les nappes osta on,
Si prirent menestrel a faire maint douls son.
796 Il ot — 800 des ces — 802 de se ; coru on — 803 Li — 818 quoy quil.
