Agrevain appiella : « Qui sont chil saudoiier ?
— Sire », dist Agrevain, « se Dieus me puist aydier,
Je ne sçay dont il sont ne de quel hiretyer,
Mais, a ce que je vois, il sont noble gherrier,
Bien samblent gentil honme, fil a noble princhier. »
Millez et Esmeréz, qui furent de Hongrie,
Sont venus ou palais le roy de Ronmenie ;
La priesse vont rompant de la chevalerie.
Millez fu li ainsnés, si con l’istore crie,
Si vint a l’empereur, qui tant ot signourie,
Et puis l’a encliné et dist a vois serie :
« Chieus nostre sirez Dieus qui de mort vint a vie,
Il ghard l’empereour et sa grant baronnie !
— Amis », che dist li rois, « Jhesus vous beneÿe !
Or me dittes, amis, et nel me celés mie,
La ou fustes vous nez, ne en quelle partie ? »
Et Milles li a dit : « Drois est c’on le vous die :
De Hongrie tout droit, chelle tierre garnie,
Fil au roi Phelippon, dont lame fu santtie,
Car mors est nostre pere, si nous vient a folie,
Pour che que nostre mere si est remariie ;
Si avons un parastre, plain de grande folie,
Car il a couvenut, par se lozengerie,
Que mes frerez ychi, qui moult a vaillandie,
Et je, qui sui ainsnés, ayons fait departie
De la tiere royaus qu’il a en sa baillie.
Or avons nous oÿ parler de l’aramie
Que Gharssilles vous fait a le barbe flourie
Et de la grande gherre qu’il vous a conmenchie,
- ↑ 735 M manque — 738 conme — 739 ot de s. — 742 lempereur — 744 ne le me — 749 si no trouuons a — 751 grant — 754 Car je — 755 que il — 758 gr. chite qui vous conmenchie.
730 app. li rois qui — 733 gherroiier — 734 fil manque
