Et ossi fait ses frerez, c’on va Millez clamand.
Pour ycelle puchielle, signeur, dont je vous cant,
Traÿ Mille son frere, Esmeret li vaillant,
Et li fist moult de mal, si conme oréz avant
En la vraie matere dont on fist le ronmand.
Quant li frere ont oÿ l’oste enssi desraynnier,
Dont disent qu’il yront au palais acointier.
Mais il ont a consseil qu’il yroient mengier
Et puis, apriès lever, yront esbanoiier ;
Et deviers le palais, la u sont li princhier,
Tout enssement l’ont fait que vous m’oéz nonchier.
Au disner les fist on moult noblement aisier,
Et apriès le disner se vont appareillier ;
Jusques au hault palais ne volrent atargier.
La fu li empererez, qui moult ot le coer fier,
Et avoecq lui estoient maint gentil chevalier,
Agrevain et Sansson, Clarion et Richier
Et maint aultre baron qui sont si conssillier.
A l’empereur estoient venus si messagier
Pour dire que Gharssille estoit ja ou gravier
Et qu’il estoit venus son paÿs essillier.
Et quant li roys l’oÿ, si prent a afficquier
Que, s’il venoit a Ronme sa chité assegier,
Qu’il ysteroit as camps contre lui sur l’ierbier.
Enssi conme il parloit en son palais plainnier,
A tant es les enffans dont vous m’oéz nonchier :
Ou palais sont entret a loy de Berruyer
Et tenant main a main si conme amy entier.
Et quant li nobles rois les prist a regaittier,
- ↑ 706 Q manque — 707 p. estorer — 708 que il — 714 volient — 716 auoecques — 722 soit pr. — 723 se il ; assegie — 724 Que il — 726 les manque — 728 amy entrer.
701 fait manque — 704 conme vous
