De che que je vous voy maintenir enssement.
— Sire », ce dist Flourenche, « je ay Dieu en couvent,
Se vous me mariéz a chel fel roy pullent,
Ja mais joie n’aray, che sachiés vraiement,
Car j’ameroie mieus, par le mien sauvement,
A recepvoir le mort au Dieu conmandement
Qu’avoir un tel signeur en droit mariement,
Car lais est et hideus et viellès durement
Et s’a rouges les yeus con charbons qui resplent,
Jhesucris le confonde, a qui li mons apent,
Quant oncques me requist d’avoir si faittement !
— Fille », dist l’empererez, « je vous jur loialment
Que vous ne l’aréz ja, par le mien sairement.
Or vous en apaisiés, laissiés vo mautalent ;
Je vois as messagiers dire vostre essient. »
L’empererez de Ronme ne se volt arriester,
As messagiers grigois en est aléz parler :
« Baron », che dist li rois, « bien em poéz raler
Et au fort roy Garssille polréz dire et compter
Que je n’ay nulle fille qui voeille marier,
Ne li conssaus de Ronme ne s’i poet acorder, »
Quant il oent le roy se responsse livrer,
Acaries li dist a se vois hault et cler :
« Sire, puis qu’enssi est que ne poés finer
De Flourenche, vo fille, qui tant a le vis cler,
Il couvient que je die, sans point de l’arriester,
Che queli rois Gharssilles m’a volu conmander,
Car il nous conmanda, plus ne le voeil cheler,
Que vostre corps fezisse en l’eure deffiier.
Je vous defi de Dieu, qui tout a a sauver,
Et dou boin roy Garsille, qui tant fait a loer ;
- ↑ 563 aler p. — 568 liure — 576 de fie de.
555 conme — 558 li e. ; jure — 561 a m.