Et qu’il n’ait nulles gherrez », dist Otes au vis fier,
« Car je le secouroie ainschois un mois entier ;
Pour chela vous voloie de che ensonniier. »
Et chieus a respondu a loy d’avantparlier :
« Sire, de vous secours a moult grant desirier,
Car li boins rois Garssilez, qui fait a resoingnier,
A grant desir d’avoir unne fenme a mouillier
La quelle vous poéz donner et ottroiier :
C’est Flourenche, vo fille, que Dieus gart d’encombrier,
La bielle et le plaisans, ou il n’ot qu’ensignier. »
Quant li rois l’entendi, le chief prist a baissier ;
Sagement respondi li rois au cuer entier :
« Signeur », dist l’empereres, « bien vous oy deraisnier.
Vous veniéz avoecq moy sus ou palais plainnier,
Et apriès le disner, je vous dy sans cuidier,
Manderay mon consseil pour che fait anonchier,
Si m’en conssilleray de gret et volentier,
Car demain se poet on a le fois consillier, »
« Baron », che dist li rois, « oéz c’on vous dira :
Ja apriès le disner on s’en conssillera,
Or en venéz o moy ! » Adont les apoingna,
En son palais maiour o lui les en mena.
À tant es vous Flourenche qui viers son pere ala,
Car moult lama la bielle, pour che le fiestia ;
Des messagiers de Gresse li rois dit ne ly a.
Quant li messagier virent Flourence qui parla
À son pere le roy, tous li sans leur mua,
Et dist li uns a l’autre :« E, vrais Dieus ! Qu’esse la ?
Vechi le douche Vierge qui Jhesucris porta !
— Ghiertes », che dist li aultrez, « c’oncques Dieus n’estora
Plus bielle creature, ne ja mais ne fera.
- ↑ 388 Et disent — 390 che manque ; que o. — 391 sera.
361 quil naist — 373 lempereour — 376 che fist
