Fil estoient le roy, che sachiés sans doubter,
Phelippre de Hongrie, le gentil et le ber.
Moult ama ses enffans dont vous m’oéz compter,
Mais li mors, qui tout fait partir et desevrer,
Fist le boin roy Phelippre dou siecle definer,
Or remest la roÿnne, qui le viaire ot cler,
Qui asséz tos apriès s’ala remarier
A un prinche felon, qui moult fist a doubter,
Qui maint jour se pena des enffans afoler
Et de faire morir, ochire et craventer ;
Et pour chela ne polrent en leur lieu demorer
Dont hoir devoient yestre de droit et possesser,
Car chieus estoit si grans qui les voloit thuer.
De son acort estoient et li comte et li per,
Et la roÿnne ossi ne li volt riens veer ;
Car vous avéz souvent oÿ dire et compter
Qu’enfez qui parastre a, on le scet bien o cer,
Qu’il poet moult bien se mere se marastre nonmer ;
Enssi avient il bien, on le voit averer.
Aïnssi fu il de chiaus dont vous m’oéz parler :
Il trouverent par tout si dur et si amer
Qu’en la fin les couvint d’Ongrie desevrer
Et laissier le paÿs et ailleurs cheminer,
En grant desirement d’aventure trouver.
Mais a loy de gharchon ne volrent point aler,
Mais bien et noblement con riche bacheler.
De ces deus enffans chi je vous lairay ester,
Mais, quant il sera point, bien saray retourner.
De Gharsille diray de Gresse oultre le mer
Pour mieux yceste ystoire et tous vrais recorder :
Car il avoit oÿ de Flourenche parler,
Son sens et sa valour ot oÿ recorder,
Si l’avoit fait Amours si fort enamourer
186 voloit — 189 Qui — 193 de hongrie — 195 desirant — 197 n. ne volrent point aler.
