Que sa fille nasqui, qui fresce ot le coullour.
Par deviers l’empereur disoient li pluisour
Que par ceste naissanche avenroit tel dolour
Que toutte Ronmenie en avenroit tristour.
Et disoient aucun au riche empereour
Que sa fille fesist mettre en aucun destour,
A le fin c’on fezist cestuy sort menteour,
U le fesist morir en cambre u en tour.
Et quant li roys oÿ recorder telle errour
Et voit les clers trestous estre en telle freour,
Adont ne scet que faire, si mua sa coullour ;
A soy meïsmes dist : « Vechi grande hidour,
Se je fay mon enffant morir a deshonnour !
Or diron li aucun, par Dieu le creatour,
Qu’il n’aroit point en moy coer, valour ne vighour
D’attendre aucun debat, aventure ou estour.
Par le foy que je doy a Dieu le crestour,
Ja enviers men enffant, qui tant a de valour,
N’en feray tel estat ne si folle labour,
Ains le feray nourir a joie et a baudour ;
En la gharde le meth de Dieu le sauveour. »
Pour sa mouillier ploura li rois Ostez maint jour ;
Sa fille fist warder en joie et en baudour.
Et plus craissoit li li enffez, plus croissoit sa valour
En bonté, en biauté, en sens et en cremour.
De se biauté avoient mierveillez li pluisour,
Dont li plus sciencheus disoient a leur tour :
« Aÿ ! biautéz », font il, « pour quoy prens ton sejour
En Flourenche, no dame, fille l’empereour ?
Car elle coustera a mant francq poingneour. »
Tous li plus sagez clercq vivoient en cremour.
Tant fu Flourenche bielle et de corps et de vis
- ↑ 108 Le second et manque.
77 fill — 84 V on le — 86 frerour — 91 Qui —98 mainte
