Mie ne sont no frere li felon mescreant,
Quoy que d’une lignie viennent en descendant,
D’Adam et de se fenme, dont j’ay parlet devant.
De ces deus furent troi, dont par mal ensciant
Ochist l’un frere l’autre ; che fu pité moult grant.
Caÿns ochist Abel, que Dieus tint a amand ;
De Caÿm sont yssut li fiel et li tirant.
Et de deus aultres frerez je vous yray disant,
Dont li uns fu trés faux, dont je diray avant,
Car son frere traÿ et ala mal cachant
Et se mouillier ossi au gent corps avenant,
Qui estoit la plus bielle de che siecle vivant ;
Car je croy c’oncques Dieus n’ala telle estorant,
Se che ne fust sa mere, Marie au corps vaillant.
Or est ainssi que chelle dont je vous voy parlant
Fu tant bielle et jolie et de tel avenant
Que Paris ou Elainne et l’amie Tristant
Ne Judith ne Fezonne, qui de biauté ot tant,
Ne furent de biauté a cestuy affreant ;
Et, se nature en lui ordonna biel samblant,
Dieus y mist le bonté et si vray enssiant
Que che fu li plus sage en clergie aprendant
Qui oncques fust au monde — che va on tiesmoingnant —,
Si que sens et biauté et bonté enssuiwant
Furent dou tout en luy si bien moutepliant
Que miracles fist Dieus pour lui en son vivant,
Enssi que vous oréz, se m’aléz escouttant.
Or entendéz a moy, se feréz que sachant,
Quar d’entendre le bien amendent li aucquant.
Signeur, chelle puchielle sage et bien doctrinee
Fu Flourenche de Ronme par son non appiellee,
Et au ber Esmeré fu la dame espouzee,
- ↑ 43 che puchielle.
21 Et des — 31 orent t. — 40 me alez
