— Naie, » che dist Elies, « mès en Dieu le grant mestre ;
Si sui nés de Saint Gille, de Provence le bele,
Fieus Julien au conte, a le chenue teste :
Avant hier m’adouba de ses armes noveles,
Car il me fu bien dit et conté tout a certes
Paien et Sarrasin sont entré en ma terre.
Je les vieng sorveoir, se trové peuent estre,
Bien les quic estormir, ains que vienge li vespres.
— Par mon cief, » dist Triacle, « trop grant deus vous apress
Ce destrier vous taurai, si le menrai en destre,
A grant honte en serés abatu de la sele,
Les jambes vers le ciel et le cief contre terre. »
Quant Elies l’entent, ne le prisse une mesple ;
Il hurte le destrier, se li lasque(s) le resne ;
Vait ferir le paien desor son elme a perles,
Qu’il en a abatu et les flors et le cercle ;
Le blanc auberc del dos li desmaille et dessere,
Tout le va porfendant enfresi qu’en l’aissele :
Li ber estor son cop, si l’abat a la terre.
Dist li rois Malatré : « Esgardés quel damage
D’un enfant de .xv. ans qui n’a gaire d’eage,
Tel vasal nous a mort et conquis par ses armes !
S’il m’atent .i. petit, g’irai a lui combatre :
Le destrier li taurai et trestoutes ses armes. »
Il hurte le destrier et le resne li lasque,
Et Elies le sien, que il bien point en haste.
Gran cos s’en vont doner sor les vermelles targes,
Sor les bendes a or les peçoient et quassent,
Mout sont boin li auberc, quant il n’en rompent maille,
Et li vasal sont preu, quant il ne s’entrabatent.
Li paiens trait l’espee qui bien luist et bien taille,
Et vait ferir Elie amont desor son elme,
