« Dan vieus, mout estes faus et gangars et enflés !
Se l’eust fait .i. autre, ja l’eust comperé ;
Mais vous estes mes peres, ne m’en doi airer. »
On li trait en la place .i. destrier sejorné,
Et Elies i monte, qui gentieus est et ber ;
Il geta a son col .i. fort escu bouclé
Et a pris en son poing .i. fort espiel quarré ;
Et on fait la quintaine tost drechier ens el pré.
Signor, franc chevalier, bien l’avés oi dire,
Quant bachelers s’adoube, jovene de barbe prime,
Por la joie de li li autre s’esbaudissent.
Si firent il le jor, quant montés fu Elye,
Tel[s] .viic. en i ot, qui tout le beneissent ;
Mais onques lor proiere[s] point de bien ne li fissent.
Car ains que soit li vespres ne sonee complie,
Sera près de la mort et de perdre la vie.
.Xx. chevalier s’atornent maintenant en la vile,
Por l’amor de l’enfant ont tout lor armes prisses,
Entr’aus juent et gabent et behordent et rient,
Fierent en le quintaine mout grant cop a delivre.
Juliens va avant, si lor commenche a dire :
« Signor, estés en sus, li cors Dieu vous garisse !
Si laissiés mon enfant trestorner a delivre :
Anqui me mostera de ses chevaleries. »
Il se traient ariere, et li enfes s’aire
Et fiert en le quintaine mout grant cop a delivre,
Les escus a perciés et les aubers des(c)lice(s),
Les estaces abat et toutes les debrisse.
Quant le voit Juliens, si commencha a rire ;
Il est passés avant, se li commenche a dire :
« Biaus fieus, mout serés preus, li cors Dé vous garisse !
Des or(e) vous doins ma tere, si l’arés toute quite.