Mainte nuit i ot geu, sejorné et chacié.
Il regarda sor destre, vit .j. aubre foillié ;
D’Olive lui remembre, commence a larmoier :
« Haï ! franche duchesse, com cest jor m’amïez,
« Et je plus vostre cors que nuns hons sa moillier !
« Quant je vos ai perdue, bien en puis enraigier. »
Li dux s’en passe outre parmi un val croissier,
Ou il oï le blasme primes de sa moillier,
Dont ele fu chaitive et il fu essilliez.
Parmi .j. brüel[et] ont lor chemin changié ;
A l’issir d’une lande troverent .j. plaissié,
Clos de pés et d’espines et de palis troiliés.
Illuc maint .j. frans maires prodons por gaaignier ;
Cil estoit hons le duc plevis et fianciez,
De lui tenoit ses terres, s’estoit ses moitoie[r]s,
Mais il ne se vot onques a Malingre acointier
Ne doner Audegour vaillant .j. sol denier.
Encor avoit Bernarz .x. filz de sa moillier :
Proz [furent] et cortois, li .v. sont chevalier,
Et a .xxx. charrues dont il fait gaainnier,
Que sui .v. fil maintienent a .lx. boviers.
Il ont laz et osiauz et grant mute de chiens ;
Li maire fait sa vinne planter et prevoignier.
Il est alez a vespres por Damedeu proier :
Damedeu reclama, le glorios dou ciel,
Qu’il garisse Doon de mort et d’encombrier.
Davant la maistre porte sus .j. perron s’asiet,
Desoz l’ombre d’un chasne grant et gros et plainnier,
— 3174 L. sejorner, mot omis dans le ms. ; chascié, ms. chascier. — 3178 plus d’après L., ms. puis ; que L. et ms. con. — 3179 Quant, L. et ms. Que. — 3180 Ms. croisie. — 3181 blasme, ms. bame. — 3185 L Clox ; palis d’après L., ms. pas. — 3190 sol denier, L. soul donier, ms. souldoier. — 3191 avoit, les deux textes a. On n’a pas dit jusqu’ici que le père se nommât Bernard. — 3194 sui, ms. ces ; a, ms. et. — 3199 garissent ; ce vers et le suivant presque entier (début du verso) sont coupés dans L.
