« De proie, d’autre chose, vaillant .iiij. deniers. »
Salmadrine la bele en a oï plaidier ;
Bien poez dire et croire son cuer en ot irié.
Venue est a Landri, ou se devoit chaucier ;
Si li baisa la boche, le genol et le pié,
Bel et cortoisement l’en prist a aresnier :
« Sire Landris de France, molt es boins chevaliers,
« De tote nostre guerre es tu venus a chief,
« Ne ma[i]s que d’une seule, mais ele est molt grief.
« Bien se venge de nos Dorames, nostre niés :
« Il a mandé ses hommes ; si retient chevalier[s]
« Et jure Damedieu, le glorios du ciel,
« Tresqu’a Costantinoble ne nos laira il riens
« De proie, d’autre chose, vaillant .iiij. deniers.
— Bele », ce dist Landris, « ester car me laissiez :
« Je les sai si coarz, si mauvais et laniers,
« Or ne cuit nul en champ encontrer ne bailler. »
Atant es vos .j. mès sur .j. corrant destrier,
Et fu parmi le cors navrez d’un roit espié,
Et monta ou palais ; ne se vot atargier ;
Li sans vermeus li raie [et] davant et darier.
A haute vois s’escrie : « Empereres, oiez... »
Et quant l’entent Landris, a poi n’est enragiez.
A haute vois escrie : « Armez vos, chevalier ! » »
Et cil li respondirent : « Com vos plaira si [i]ert. »
Lors s’adobent ensemble li noble chevalier,
Et vestent les haubers, lacent heaumes vergiez
Et ceignent les espées a[u] poing d’or entaillié
Et pendent a leur cols les escuz de cartier
— 2439 o. plaidoier. — 2440 irié, ms. iriés. — 2446 Ne m. ques ; m. griefve. — 2447 de vous, votre n. — 2449 le, ms. dou le. — 2450 vous l. — 2453 sai, ms. sauz (ou sanz) ; et si m. — 2454 champ, ms. chant. — 2456 espié, ms. espiés. — 2458 darier, ms. dariere. — 2459 h. v. rescrie. Il est probable qu’il y a une lacune après ce vers, cf. v. 2434 et suiv. — 2460 n’est, ms. n’a. — 2464 vergiez ms. vergiers. — 2465 ceignent, ms. ceindent.
