« Sire Do de la Roche, » ce dist Pepins li rois,
« Vos penrez vostre fame, jel vuel et si l’otroi,
« Quant il de ma seror ne puet estre autre roi,
« D’Olive la duchesse, qui a le cors cortois.
« Mais ja ne ferai chose dont plus forment me poi[s]t.
— Sire », ce dit Tomiles, « aiez pa[i]s, ce que doit ?
« Laissiez ester le plait de Doon et de moi,
« Et je vos en donrai grant part de mon avoir :
« .XX. mulez toz chargiez de fin or arabois.
— Je l’otroi, beaus amis, » ce li a dit li rois.
Le jor en fu li plaiz ou palaiz maginois :
.XX. mulez en reçoit trestoz chargiez d’avoir ;
Quant les ot receüz, si ’n ot au cuer enoi.
Puis a dit .iij. paroles, coiement, en requoi :
« Ha[ï] ! Olive dame, grant duel porrez avoir
« Quant vos verrez voz regnes autre fame tenoir.
« Miens en ert li domaiges, car je[l] sai et otroi. »
Do demande congié et Tomiles li lerres ;
« Seignor, alez a Dieu, » si a dit l’emperere ;
« Quant noces volez faire, [soit] ma serors remese ;
« Mais dorenavant vueil qu’ele soit bien gardée
« Et de vair et de gris richement afublée,
« Si ait en sa compaigne .iij. homes a espées ;
« Et qui mal lui fera, si soit chier comparée.
« Cuidiez vos, sire Do, par l’arme vostre pere,
« Que, se Landris vit tant que [il] ceingne l’espée,
